Bu gün "Simurq"a yeni məşqçi təyin edilib.
Korner.az-ın klubun rəsmi saytına istinadən məlumatına görə, ötən mövsüm karyerasının başa vuran Rauf Mehdiyev Zaqatala klubunda məşqçi kimi işə qəbul edilib.
O, klubun aşağı yaş qruplarında ibarət komandalarının və əvəzedici heyətin qapıçılarla işləyən məşqçisi olacaq.
Rauf Mehdiyev futbolçu karyerasına 1992-ci ildə Sabirabadın "İnşaatçı" klubunda başlayıb. Daha sonra isə Bakının "Tərəqqi", "Azəri", "Neftçi" "Ferid", o cümlədən "Şəmkir", "Qarabağ", "Bakı", "Olimpik", "Karvan" komandalarında forma geyinib. Karyerasına isə "Neftçi" klubunda son qoyub. Təcrübəli əlcək ustası 2009-cu ildə "Simurq"da da oynayıb. O, komandamızın UEFA-nın təsnifat mərhələsindəki çıxışı zamanı Zaqatala təmsilçisinin şərəfini qoruyub. Rauf Mehdiyev həmçinin 2004-2008-ci illərdə yığma komandanın heyətinə də dəvət alıb.
Qeyd edək ki, Mehdiyev "Simurq"dakı ilk məşqçilik sınağında əvəzedici heyətin qapıçıları ilə yanaşı, aşağı yaş qrupları ilə də işləyəcək.
