Şahin Diniyev: “Kəpəz” ona yaraşmayan yerdədi”
29.11.2019 , 16:25
Ötən gün ARB “Aranfilm” yaradıcılıq mərkəzinin istehsalı olan “Kəpəz” futbol klubunun 60 illik yubileyinə həsr olunan “Kəpəz”ə gedən yol” sənədli filminin təqdimatı keçirilib.
Filmin premyerasında futbol ictimaiyyətinin nümayəndələri iştirak edib. Filmdə müxtəlif dövrlərdə “Kəpəz”in şərəfini qorumuş futbolçular ön planda yer alıblar. Bu mənada veteranlardan Nurəddin Əliyev, Vahid Abbasov, Səfər Rəhimov, Asim Xudiyev, Maşallah Əhmədov, Asif Əliyev, Mehman Allahverdiyev, Şahin Diniyev, Vəli Qasımov, Yunis Hüseynov və başqaları unudulmaz xatirələri bölüşüblər.
Filmin təqdimatından sonra “Kəpəz”in keçmiş futbolçusu və məşqçisi Şahin Diniyev korner.az saytına açıqlama verib:
Veteran futbolçu “Kəpəz”dəki illərindən söz açıb:
“Doğurdan da həm məşqçi, həm də futbolçu kimi özümün inkişaf dövrünü “Kəpəz”də yaşamışam. Ən gözəl illərimi burda keçirtmişəm. Əlbəttə ki, klubla bağlı xoş anlarım çoxdu. Təsirli film idi. Bizi o illərə apardı. Hər bir filmdə sətiraltı məna və düşüncə var ki, baxdıqca insan keçmişə qayıdır.
Bu gün “Kəpəz” ona yaraşmayan yerdədi. Gəncə futbolunu Azərbaycan futbolunun Məkkəsi adlandırardım. Əgər Gəncədə futbol yoxdursa, Azərbaycanda da futbol yoxdur deyərdim”.
