“Çox maraqlı və gərgin oyun alındı. Qarşılaşmadan əvvəl məğlub ola biləcəyimizi demişdim. Rəqibimiz yaxşı komanda olduğunu göstərdi, Qlazqoda çətinlik çəkdik. “Seltik”in baş məşqçisini və futbolcularını təbrik edirəm. Mən komandamdan razıyam, yaxşı oyun nümayiş etdirdi”.
Korner.az-ın məlumatına görə, bu sözləri Çempionlar Liqasının III təsnifat mərhələsi çərçivəsində “Seltik”ə 0:1 hesabı ilə məğlub olan “Qarabağ”ın baş məşqçisi Qurban Qurbanov oyundan sonra mətbuat konfransında deyib.
Qurbanov cavab matçında azarkeşlərin dəstəyinə arxalanacaqlarını bildirib: “Bizi Azərbaycan azarkeşlərinin dəstəyi altında çox maraqlı cavab oyunu gözləyir. Burada 10 minlərlə azarkeş qarşısında oynamaq xoş idi. Ancaq bizim də böyük fanat ordumuz var. İnanıram ki, onlar bizim qələbə qazanıb mərhələ adlamağımız üçün bizə böyük dəstək verəcəklər”.
Qeyd edək ki, “Qarabağ”-“Seltik” oyunu avqustun 5-də keçiriləcək. Qarşılaşma saat 21:30-da başlayacaq.