“Qəbələ”nin qış fasiləsində yollarını ayıracağı futbolçuların adına böyük ölçüdə aydınlıq gəlib.
Korner.az-ın məlumatına görə, baş məşqçi Yuri Syomin əsasən ondan əvvəl komandaya cəlb olunan legionerlərlə yola salacaq.
Gedənlərdən biri Deyan Kelhar olacaq. Vladimir Levin və İbrahima Niasse ilə rəqabətə tam gətirə bilməyən sloveniyalı mərkəz müdafiəçisi cari mövsümdə Premyer Liqada 7 oyuna çıxaraq 250 dəqiqə oynayıb.
Onunla yanaşı daha bir mərkəz müdafiəçisi – Omar Kalabanenin gedişi dəqiqləşib. Qvineya yığmasının üzvü heç cür Syominin etimadını qazana bilmir. Bunun nəticəsidi ki, o, bu mövsüm Premyer Liqada 3 oyun keçirib (270 dəqiqə).
Yarımmüdafiə xəttindən isə Lorival Assisin gedişi mümkündü. Syomindən əvvəl Bolqarıstanının “Çernomorets” klubundan alınan braziliyalı gününü ehtiyat oyunçular skamyasında keçirir. Rusiyalı mütəxəssis ona 4 oyunda cəmi 119 dəqiqə oynamaq şansı verib.
Syomin özü gətirdiyi futbolçulardan yalnız Abdulvahid Afolabi göndərə bilər. Nigeriyalı forvard Premyer Liqada 11 oyun keçirsə də, rəqib qapılarına yol tapa bilməyib. “Kuban”dan gələn 22 yaşlı hücumçu ölkəmizdə yeganə qolunu kubokda “Mil-Muğan”ın qapısına vurub.
Yerli futbolçulardan isə Elmar Baxşıyevin gedəcəyi dəqiqdidi. Cari mövsümdə 1 dəqiqə belə oynamayan 33 yaşlı yarımmüdafiəçi qışda klub axtarmalı olacaq. Onunla yanaşı, 22 yaşlı Şəhriyar Xəlilovun da gedişi baş tuta bilər. Çünki gənc yarımmüdafiəçi də Syominin güvənmədiyi futbolçulardan biridi.
Bundan başqa Nizami Hacıyevin Polşanın “Poqon” klubuna keçidi gözlənilir. Tərəflər arasında razılıq əldə olunsa cari mövsüm meydana çıxdığı 13 oyunda rəqib qapıçıları məyus edə bilməyən 25 yaşlı futbolçu yola salınacaq.
Elnur Allahverdiyevin isə icarə müqaviləsi başa çatır. Müdafiəçinin qışda yenidən “Xəzər Lənkəran”a dönəcəyi gözlənilir.
20 yaşlı hücumçu Nuran Qurbanovun isə yenidən icarəyə verilməsi gözlənilir.
