“Bugünkü rəqibimiz Avropada ən güclü komandalardan biridir”.
Korner.az-ın məlumatına görə, bu sözləri millimizin baş məşqçisi Robert Prosineçkinin “Şaxtyor”a (Donetsk) 1:2 hesabı ilə uduzduqları yoxlama matçından sonra öz fikirlərini bildirərkən deyib.
“Birinci hissəni çox yaxşı oynadıq. Görmək istədiklərimi oyunda canlı olaraq, gördüm. Bu matç test sınağı xarakterli idi. Oyunçuların nəyə qadir olduqlarını müəyyənləşdirmək mənasında, çox əhəmiyyətlidir. Oyundan razı qaldım. Üç gün birlikdə olmuşuq, vaxt azdır. Daha yaxşı olmaq üçün bir çox şeylərin üzərində işləməliyik. Demişəm ki, azərbaycanlı futbolçuların keyfiyyəti var. Özləri də buna inanmalıdılar. Mənə elə gəlir ki, birinci hissədə bunu sübut elədik.
Baş məşqçi komandadan razı qaldığını deyib.
“Mübarizə aparırdıq, top saxlayırdıq, ötürmələr verirdik. Bəli, ikinci hissədə rəqibə topla daha çox oynamağa imkan verdik. Amma yenə deyirəm, bütün komandadan razı qalmışam. Bu, ümid verir ki, biz gələcəkdə daha yaxşı oyun göstərəcəyik. Nəzərə almalıyıq ki, futbolçularn bir neçəsi ilk dəfə oynayırdı və rəqibimiz çox güclü “Şaxtyor” komandası idi. Yeni oyunçulardan razı qalmışam. Anton Krivotçuk gələcək üçün çalışır. Bu oyunçu öz üzərində işləməlidir, onu çox iş gözləyir. Bir neçə ildən sonra sol cinah müdafiəçisi mövqeyində bizdə problem olmayacaq. Həm gənclərdən, həm də ümumi komandadan razıyam.
Prosineçki Ruslanla bağlı suala belə cavab verib:
“Niyə həmişə Ruslanla bağlı soruşursuz? Bu gün həmin mövqedə oynayan futbolçular – Qara və onların önündə çıxış edən Cavidlə Rahid birinci hissədə əla oyun nümayiş etdirdilər. Birinci hissədə rəqibə çox şans vermədik. Vurulan qol cərimə zərbəsindən sonra baş verdi. Canlı səddən qayıdan topu “Şaxtyor”un futbolçusu təkrar zərbə ilə qapımızdan keçirdi. Yəni hansısa oyun epizodundan top buraxmadıq. Buna görə, birinci hissədə komandadan tam razı qalmışam. Düzdü, uzun ötürmələrlə çox oynamadıq. Onsuz da, biz birinci hissədə gözəl futbol nümayiş etdirdik.
