Rusiyanın Krasnodar şəhərindəki futbol stadionunun qərb tribunasından II Dünya Müharibəsi illərindəki minaları xatırladan maddə tapılıb. Lent.az-ın məlumatına görə, bu barədə Krasnodar şəhəri üzrə Daxili İşlər İdarəsinin mətbuat katibi İlya Şakalov açıqlama verib.
Partlayıcıya oxşar maddə mayın 12-də səhər saatlarında aşkarlanıb. Dərhal idman qurğusu ərazisindəki bütün şəxslər evakuasiya olunub. Stadionda kinoloqlar işləyiblər, nəqliyyatın və piyadaların hərəkəti müvəqqəti məhdudlaşdırılıb. Araşdırmalardan sonra məlum olub ki, bu, universal tüstü şaşkasıdır və görkəmindən tank əleyhinə minanı xatırladır. Onun mövsümün sonunu bayram etmək məqsədilə hazırlandığı güman olunur.
Qeyd edək ki, hazırda bu arenada “Kuban” və “Krasnodar” klubları ev matçlarını keçirir. Mayın 13-də stadionda Rusiya Premyer Liqasının 44-cü turunun “Kuban” – “Dinamo” (Moskva) matçı oynanılacaq.
