Xırdalan şəhərindəki AAAF Park Yaşayış Kompleksinin yarış zalında yaşı 20 və 23-ə qədər olan gənclər arasında ağır atletika üzrə Azərbaycan birinciliyinə start verilib. Yarışda ölkənin bütün regionlarından klub və cəmiyyətləri təmsil edən yüzdən çox atlet iştirak edir.
Kişilərin mübarizəsində günün son qalibi 62 kq çəki dərəcəsində müəyyənləşib. Qızıl medala toplam 271 kq (123+148) nəticə ilə Məhəmməd Məmmədli sahib çıxıb. Gümüş medala 251 kq (121+130) nəticə ilə Kənan Xəlilov, bürüncə isə 227 kq (100+127) nəticə ilə Elməddin Hüseynov layiq görülüb.
Çempionatın təşkilində məqsəd idmançıların ustalıq səviyyəsinin artırılması və təkmilləşdirilməsi, texniki cəhətdən hazırlıqlı və dərəcə normalarını yerinə yetirən idmançıların seçilməsi, kişilərdən və qadınlardan ibarət milli yığma komandaların tərkibinin müəyyənləşdirilməsi, qarşıdakı beynəlxalq yarışlara hazırlanmasıdır.
