Ukraynanın “Şaxtyor” klubunun baş məşqçisi Mirça Luçesku son günlər Donetsk şəhərində baş verən hadisələrdən danışıb.
Korner.az-ın məlumatına görə, rumıniyalı baş məşqçi qorxmadığını, amma baş verənlərdən heyrətə gəldiyini vurğulayıb.
Luçeskunun sözlərinə görə, şəhərdə baş verənlər televiziya ekranında göstərilənlərdən tamamilə fərqlənir: “Jurnalistlərin hadisələri dramatikləşdirmək niyyəti həqiqətdə baş verdiyindən xeyli fərqlidir. Donetskdə sakitlikdir. Təkcə şəhərin mərkəzində yerləşən hökumət binalarının ətrafında kiçik aksiyalar keçirilir və onların təsiri yoxdur. Orada ancaq ruslardır və rus dilinə görə aksiya keçirirlər”.
Baş məşqçi bundan sonra nə baş verəcəyini bilmədiyini qeyd edib: “Vəziyyət hələlik stabildir. Amma gərginləşə bilər. Bütün həyatım boyu professional olmuşam və bu dəfə də mənim münasibətimdə heç nə dəyişməyib. Allah eləməsin ki, nəsə baş versin. Mənə və komandama heç bir problem yoxdur. Biz məşq edirik və hazırlaşırıq. Ötən həftə oyunda 30 min azarkeş gördük. Bunu görmək çox xoş idi”.
