“Şübhəsiz ki, qrupumuzun favoriti “Borussiya”dır. “Krasnodar”da daxil olmaqla, digər üç komanda ikinci yer uğrunda mübarizə aparacaq. Bu üç komandanın qrupdan çıxmaq şansları bərabərdir”.
Korner.az-ın Rusiya mətbuatına istinadən yaydığı xəbərə görə, bu sözləri “Krasnodar”ın baş məşqçisi Oleq Kononov Avropa Liqasının qrup mərhələsinin püşkünü dəyərləndirərkən deyib.
Rusiya təmsilçisi Avropa Liqasının qrup mərhələsində “Qəbələ”, Dortmund “Borussiya”sı və PAOK-la eyni qrupda mübarizə aparacaq.
O.Kononov hər üç rəqibin ona tanış olduğunu bildirib:
“Karpat”ın baş məşqçisi olanda “Borussiya” və PAOK-la qarşılaşmışam. “Borussiya” ilə Lvovda keçirdiyimiz gərgin qarşılaşmanın sonunda 3:4 hesabı ilə uduzmuşduq. PAOK-la “pley-off” mərhələsinin oyununda onları keçməyi bacarmışdıq. PAOK ciddi ənənələrə sahib klubdur. Azarkeşlər komandalarını yaxşı dəstəkləyirlər. Yunanıstanda oynamaq çətin olacaq”.
A.Kononov “Qəbələ” barədə də fikirlərini bölüşüb:
“Qəbələ”nin baş məşqçisi Roman Qriqorçuku yaxşı tanıyıram. O, Ukrayna klubları ilə çalışmış güclü mütəxəssidir. İndi “Qəbələ”də bir neçə ukraynalı futbolçu çıxış edir ki, onlar mənə tanışdır. Buna görə də “Qəbələ” ilə də hesablaşmaq lazımdır”.
“Krasnodar”ın baş məşqçisi hər oyuna qələbə üçün çıxacaqlarını bildirib:
“Borussiya”da daxil olmaqla bütün rəqiblərimizə qalib gələ bilərik”. (qol.az)