Ağdamın “Qarabağ” klubu Avstriyada təlim-məşq proseslərini davam etdirir.
Korner.az-ın klubun rəsmi saytına istinadən verdiyi məlumata görə, hazırlığın növbəti günündə komandanın bir məşqi olub.
Məşq prosesi 100 dəqiqə davam edib. Komandanın bu məşqi fiziki hazırlığın təkmilləşməsi üzərinə qurulub. Yüngül isinmə hərəkətlərinin ardından meydanboyu qurulmuş məneələri dəf edərək qapıya zərbələr üzərində çalışılıb. Olduqca yüksək tempdə davam edən çalışma yüngül qaçışla başa çatıb.
“Qarabağ”ın məşqində Rəşad Sadıqov yenə də fizioterapevt nəzarəti altında çalışıb. “Şaxtyor”la oyun zamanı yüngül zədə alan komandanın yeni transferi Danilo Dias da kollektiv çalışmalarda iştirak etməyib. Amma braziliyalının zədəsi ciddi deyil.
Bu arada təlim-məşq toplanışı çərçivəsində komandanın keçirəcəyi ikinci hazırlıq matçının başlama saatı müəyyənləşib. “Qarabağ” ayın 28-də “Krasnodar”la Bakı vaxtıyla 19:00-da qarşılaşacaq.