Türkiyənin “Karşıyaka” idman klubu idarəçiləri və Karşıyaka Bələdiyyəsi Məclis üzvləri Xocalı orta məktəb şagirdlərini ziyarət edib.
Korner.az-ın məlumatına görə, Azərbaycanda yaşayan iş adamı, KSK konqres üzvü Halil İbrahim Durur, KSK keçmiş sədri, Bələdiyyə Məclis üzvü Ahmet Dikerin səyi və Karşıyaka Bələdiyyə başçısı Hüseyn Mutlu Akpınarın təlimatı ilə Bakıya gələn məclis üzvləri Faruk Yıldırım və Yücel Çağatay uşaqlara KSK-dan istədikləri hədiyyə, forma və şərflər gətirib. Böyük maraqla gözlədikləri KSK şərfinə və formasına qovuşan Xocalı orta məktəb şagirdləri “Biz Karşıyakalıyıq” yazılı plakatın qarşısında, şərfləri çiyinlərində, formaları əyinlərində klubun simvol marşını oxuyaraq, “KafKafKaf Sin SinSinKaf Sin Kaf Sin Kaf” – deyə məktəbin həyətini inlədib. “İlk gündən bəri Karşıyakanı uşaqlarla idarə edəcəyimi bildirirəm. Uşaqlar bizim hər şeyimiz, gələcəyimizdir. Azərbaycan uşaqları da bizim uşaqlarımızdır, onların istədikləri hədiyyələri çatdırmağın xoşbəxtliyini yaşayıram” – deyən Karşıyaka Bələdiyyəsi başçısı Hüseyn Mutlu Akpınar tezliklə Xocalı uşaqlarını Karşıyakada qonaq etmək istəyini bildirib. Veteran futbolçu, keçmiş milli hakim, Karşıyaka Bələdiyyəsi məclis üzvü Yücel Çağatay təəssüratlarını paylaşaraq, bu dəstəyin davam etdiriləcəyini qeyd edib:
“Karşıyaka İzmirin ən qədim klublarından biridir. Eyni zamanda dünyanın hər yerində klubuna ürəkdən bağlı azarkeş kütləsi var. Dedilər Azərbaycanlı uşaqlar forma və şərf istəyib, biz də hazırlayıb, gətirdik. Getdiyimiz zaman oradakı uşaqların ana – atalarının qətl edildiyini öyrəndik. Onlar böyük həvəslə formanı geyinərək, klubun simvol marşını oxudular. Əminəm ki, iş adamlarımız, Karşıyaka azarkeşləri bunu diqqətlə izləyəcək və bu mövzuda daha hansı kömək etmək olar düşünəcəklər”.
