"Oyun çox gərgin məcrada keçdi. Bu oyunda “Bakı”nın bir sıra aparıcı oyunçuları iştirak etməsə də, onlara qarşı oynamaq ağır idi".
Korner.az-ın məlumatına görə, bu sözləri "İnter" klubunun baş məşqçisi Kaxaber Sxadadze deyib.
"Bankirlər"in baş məşqçisi "Bakı" ilə oyundan sonra (1:0) keçirilən mətbuat konfransında qarşıya qoyulan məqsədə çatdıqlarını bildirib: "Futbolçuların üzərində psixoloji basqı var idi. Son iki gündə futbolçularla daim söhbət edirdik. Qarşıya qoyulan məqsədə çatdıq. Bu il "İnter"i heç kim ciddi qəbul etmirdi. Futbolçular mövsüm boyu özlərini yaxşı tərəfdən göstərdilər.
Oyunun sonlarında böyük məsuliyyət hiss etməyə başladım. Çünki avrokuboklarda ancaq klub üçün yox, həm də ölkənin adından çıxış edəcəyik. Heyəti düzgün formalaşdırıb, uğurlu çıxış edəcəyimizə inanıram. Əsas odur ki, nəticə göstərək. “Bakı”ya kubokun finalında və avrokuboklarda uğurlar arzulayıram”.
