“Hafiz Məmmədov “Lans”a sahib olmasından sonra komandamızda irəliləyiş hiss olunur. Onun gəlişi futbolçularımıza yeni impuls verib. Amma bu, bizi arxayın salmamalıdır. Hazırda “Lans”ın üzvləri hədəfə yetişmək üçün həmrəy olmalıdır”.
Korner.az-ın Fransa mətbuatına istinadən yaydığı xəbərə görə, bu sözləri “Lans”ın futbolçusu Ələddin Yahia bildirib.
2008-ci ildən “Lans”ın şərəfini qoruyan Ə.Yahia komandasının yüksək liqaya çıxmaq uğrunda mübarizə apardığını söyləyib. O, bunun çətin olacağını desə də, istəklərinə nail olacaqlarına inandığını ifadə edib: “Biz ən azı “Lans”ın azarkeşlərinə görə bunu etməliyik. Birinci liqaya vəsiqə qazanmasaq, azarkeşlərimizə haqsızlıq etmiş olarıq”.
Təcrübəli futbolçu klubun sahibi Hafiz Məmmədov haqda danışarkən deyib: “O, futbolu sevən insandır, bura təsadüfən gəlməyib. O, bizim kluba investisiya yatırır. Hafiz Məmmədovun gəlişindən sonra komandamız düzəlir. Mən inanıram ki, bu ilin may ayında “Lans” birinci liqaya yüksəlməsini qeyd edəcək”.
