Son vaxtlar Hafiz Məmmədov haqqında yazılanları heyrət içində oxumaqdayam: “Hafiz Məmmədov hava limanında həb olundu”, “Hafka”nın klubu yüksək liqaya buraxılmadı”, “Hafka”nın bankı müflisləşir” və s. və i.a. İş adamının başının üstündə “qara buludlar” dolaşır: biznesində, əsasən də bankında maddi axsamalar var, sahib olduğu “Bakı”ya əvvəlki kimi vaxt və pul ayıra bilmir – yetərincə başadüşülən vəziyyət deyilmi? Biznesdə heç çala-çökəyə düşməmiş iş adamı gördünüzmü siz? Adam bu qədər problemlə savaşarkən media nə edir? Hərə bir tərəfdən didir… Hər ikisinin – “Hafiz Məmmədov uğrunda” cəbhəsinin də, “Hafiz Məmmədova qarşı” cəbhəsinin də bir amalı var: bu savaşın sonunda əvvəlkindən daha böyük pay almaq. Hafiz Məmmədov böyük “yem”di axı, hamıya çatacaq qədər böyük…
Mən “bulvar qiyafəli”, “sarı donlu” ictimai-siyasi medianı anlayıram. Hərəsi bir məmurun, bir biznesmenin, deputatın və s.-in cibindədi və Hafiz Məmmədov yekəlikdə “yem”i parçalamağa hazır olan “akulaların dişləri” rolunu oynamaqdadı. Bəs idman mediası? Dünənədək qapısının ağzını kəsdirən, İcraiyyə Komitəsinin iclaslarına “Baghlan Group”-un ofisinə gedən yol kimi baxanlar bu gün o “dişlər”in axıtdığı zəhərləri (xəbərləri) paylaşmaqda, çoxaltmaqdadı. Bir vaxtlar hamısı üçün “Hafiz müəllim” olan Məmmədov bu gün “Hafka”ya çevrilib, barəsindəki yalan-doğru xəbərlərin başlıqlarını, mətnlərini bu xitabla yazmaqdadılar. Görünür, ciblərinə basılan avroların yaratdığı istilik aradan gedib. Avro da kağızdı axı, yanmağıyla sönməyi bir olur. Eybi yox, bol sıfırlı yeni reklam müqaviləsi aranı isidər, “kəbin”in müddətini artırar. Hafiz Məmmədov rəhmlidi axı, xəyanəti tez bağışlayar…
Hafiz Məmmədovu təkcə mətbuatda dost bildikləri yox, həm də fəxrlə “bunlar mənim ailəmdirlər!” – dediyi futbolçuları satdılar. O futbolçular ki, ötənilədək “Bakı”ya, daha doğrusu, pulun iyinə qaça-qaça gəlirdilər. O futbolçular ki, 9 ayın sonunda bosun üzünü ağardacaq bir qara qəpiklik uğur qazanmadılar. Və “gəmi”yə su dolmağa başlayan kimi dabana tüpürüb qaçdılar, qaçmaqdadılar. Eybi yox, bol sıfırlı yeni müqavilə “dəliklər”i doldurar. Hafiz Məmmədov səxavətlidi axı, xəyanəti tez bağışlayar…
P.S. Bu ölkənin adı, bu ölkənin “Bakı” adlı klubu üçün gördüyü işlərin müqabilində hər yerindən duranın Hafiz Məmmədova “daş” atması çox hüznlü tablodu, tamam, amma görəsən Hafiz bəy o tablonun maliyyə dəstəkçisinin elə özü olduğunu bilirmi? Qınayırmı özünü görəsən? Küsürmü özündən pul verib dəstək ala bilmədiklərindən küsdüyü kimi? Özünü də bağışlayarmı görəsən? Hafiz Məmmədov unutqan deyil axı…
Saleh Arslan
