FİFA-nın bayrağı altında keçirilən UEFA İnkişaf turnirində çıxış edən Cəbəllütariqin U-16 yığması tarixi uğura imza atıb.
Korner.az-ın məlumatına görə, cırtdan ölkə təmsilçisi Makedoniya ilə görüşdə kuryoz qolla diqqət mərkəzinə düşüb.
Oyunun sonlarına doğru Makedoniya millisi hesabı açsa da, onların sevinci çox qısa çəkib. Belə ki, makedoniyalılar meydanın özlərinə aid hissəsində qolun sevincini yaşayarkən Cəbəllütariqin futbolçuları dərhal oyuna mərkəzdən başlayaraq bərabərlik qolunu vurublar.
Mərkəz xəttinin üzərindən topa vurulan anda hər iki komandanın üzvləri meydanın özlərinə aid hissəsində olduğu üçün matçın baş hakimi qolu qeydə alıb. Bununla da, oyun heç-heçə başa çatıb – 1:1. Daha öncə qrupda Malta və San Marinoya qalib gələn Cəbəllütariq yığması 7 xalla turnirin qalibi olub.
Qeyd edək ki, Makedoniya yığması 3 oyundan sonra 7 xal toplasa da, topların fərqində daha yaxşı göstəriciyə malik olan Cəbəllütariq millisi tarixində ilk dəfə turnirin qalibi adına sahib çıxıb.
