“Rəvan”ın baş məşqçisi Güvenc Kurtar Türkiyənin “Doğan” xəbər agentliyinə müsahibə verib.
Korner.az-ın məlumatına görə, o, Topaz Premyer Liqası haqda fikirlərini bildirib, transfer planları haqda danışıb.
– Əvvəlcə Azərbaycan Premyer Liqası haqda fikirlərinizi bilmək istərdik.
– Burada yüksək səviyyəli bir neçə klub var. Çempionatda çox yaxşı futbolçular oynayır. Türkiyə superliqasında çıxış edə biləcək gücdə futbolçular var. İtaliya A seriyasında, Braziliyada oynamış oyunçular hazırda futbolçu karyeralarını Azərbaycanda davam etdirirlər.
– Mustafa Dənizli ilə eyni liqada mübarizə aparmaq necə bir hissdir?
– Türkiyədə də onunla eyni liqada çalışmışıq. Azərbaycan bizim ikinci vətənimizdir. Onunla çox görüşmürük. Çünki o, Bakıdan uzaqda işləyir. Bir müddət keçdikdən sonra daha tez-tez görüşəcəyik.
– Azərbaycanda futbolçuların gəliri necədir?
– 5-6 klubda verilən maaşlar yaxşıdır. Bir sözlə, buradakı oyunçuların aldığı məvacib Türkiyədə futbolçuların qazandığı pula çox yaxındır.
– Azərbaycanın paytaxtı Bakı haqda nə deyərdiniz?
– Bakı gözəl şəhərdir. İşlədiyim üçün gəzməyə hələlik vaxtım olmur. Amma burada yaxşı restoranlar və kafelər var. Buna görə də Bakıya gələn futbolçular bura uyğunlaşmaqda heç bir çətinlik çəkməyəcək.
-Türkiyədən futbolçu transfer etməyi düşünürsünüz?
– Hələlik belə bir fikrim yoxdur. Hazırkı heyətlə nələr edə bilərik, onu düşünürəm. Qarşıda Azərbaycan kubokunda matçımız var. “Neftçi” kimi güclü və səviyyəli bir rəqiblə oynayacağıq. Bu səbəbdən transfer düşünmürəm.