“Rəvan”ın yeni baş məşqçisi Güvenç Kurtar fəaliyyətə başlayıb.
Korner.az-ın məlumatına görə, komandanı gündə iki məşqə çıxaran mütəxəssis Türkiyə mətbuatına açıqlama verib.
Kurtar Azərbaycanla bağlı fikirlərini bildirib: “Qardaş ölkə Azərbaycana əvvəllər də gəlib-gedirdim. Burda özümü yaxşı hiss edirəm və bu duyğu yeni komandamı müəyyənləşdirməkdə önəmli oldu. “Rəvan”la bağlı əvvəlcədən məlumatım var idi və komandanı izləyirdim. Bu klubla ölkə xaricinə çıxmaq üçün anlaşdım. Hələlik bir illik müqavilə imzalamışam. Amma uğur qazanacağım halda anlaşmanın müddətini uzadacağıq. Azərbaycan futboluna xeyir vermək və burda futbolçular yetişdirmək istəyirəm. Aşağı yaş qruplarına da önəm verəcəyik. Milli komandaya yardımçı olacağıq. Bunların hamısını beynimdə planlaşdırmışam. Klub prezidenti və idarəçilərlə yaxşı münasibətlərimiz var”.
“Rəvan”ın pis mövsüm keçirdiyini və turnir cədvəlinin aşağı sıralarında olduğunu xatırladan Kurtar öncə komandanın əhval-ruhiyyəsini düzəldəcəklərini, futbolçuların özünə inam hissini artırmağa çalışacaqlarını bildirib. Transfer çalışmalarından danışan mütəxəssis vətənindən də oyunçu ala biləcəklərini qeyd edib: “Türkiyədən də futbolçu transfer edə bilərik. Amma orda maliyy şərtləri daha yaxşı olduğu üçün türk futbolçular Azərbaycanda oynamağa üstünlük vermir. Önəmli olan Azərbaycanda futbolçu yetişdirməkdi. Burda gənc futbolçular yetişdirmək və hazır oyunçuları daha yaxşı duruma gətirmək bizim üçün daha faydalı olacaq”.
Kurtar məşqçilər korpusunda türk mütəxəssislərin yer alacağını da bildirib.
