DÇ-2014-ün seçmə mərhələsi çərçivəsində Lüksemburq şəhərindəki Josy Barthel stadionunda keçirilmiş Lüksemburq – Azərbaycan oyunundan sonra hər iki komandanın baş məşqçisinin səsləndirdiyi fikirləri diqqətinizə çatdırırıq:
Berti Foqts (Azərbaycan millisinin baş məşqçisi): “Futbolçulardan daha yaxşı mübarizə gözləyirdim. Təəssüf ki, qələbə qazana bilmədik. Belə oyunlarda tam gücünlə oynamalısan. Bu gün bunun şahidi olmadıq. Lüksemburq yığması müdafiədə mütəşəkkil şəkildə oynadı və qol epizodu yaratmağımıza imkan vermədi. Bizi qane edə biləcək yeganə məqam qol buraxmamağımızdır. Halbuki vacib qolu vurmaq üçün rəqibimizin şansları vardı.
Düşünürdüm ki, daha aqressiv oynayacağıq. Lazımi qədər mübarizə aparsaydıq, qalib gələ bilərdik. Qarşılaşma göstərdi ki, Azərbaycanda bacarıqlı futbolçular var, amma onlar anlamalıdır ki, belə rəqiblərlə oyunlarda tam qüvvə ilə mübarizə aparmaq lazımdır”.
Luc Holtz (Lüksemburq millisinin baş məşqçisi): “Azərbaycan millisi oyuna nəzarət etmək, meydanda dominantlığını göstərmək istəyirdi. Amma biz buna imkan vermədik. Sevinirəm ki, komandam bu gün bir xal əldə edə bildi. Ancaq düşünürəm ki, biz bundan da artığına nail olmağı bacarardıq. Bir az bəxtimiz gətirsəydi, Azərbaycan millisini məğlub edə bilərdik”.
affa.az
