Çempionlar Liqasının oyunları çərçivəsində baş tutan “Benfika” (Portuqaliya) – “Barselona” (İspaniya) matçında baş hakim Cüneyt Çakıra qarşı hörmətsizlik edilib.
Korner.az– ın məlumatına görə, oyunun 19-cu dəqiqəsində Kataloniya klubunun futbolçusu Sesk Fabreqas referinin köynəyini arxadan çəkərək, qərarına etiraz edib.
Həmin vaxt “Barsa” 1:0 hesabı ilə öndə, Fabreqasın passivində isə bir sarı vərəqə olub. Bu hərəkəti qarşılığında baş hakim futbolçunu ikinci sarı vərəqə ilə meydandan qovmayıb. Əvəzində Fabreqas 56-cı dəqiqədə komandasının ikinci qolunu vurub. Ancaq Çakır matçın 88-ci dəqiqəsində “Barselona”nın digər futbolçusu Serxio Busketsə birbaşa qırmızı vərəqə göstərib.
Qeyd edək ki, Cüneyt Çakır iki ay öncə Türkiyə Superkubokunda “Fənərbağça” ilə oyun zamanı yaxasından yapışan “Qalatasaray”ın futbolçusu Engin Baytara qırmızı vərəqə göstərib. Nəticədə Türkiyə Futbol Federasiyasının İntizam Komitəsi Baytarı 11 oyunluq cəzalandırıb.