Bu gün Topaz premyer liqasının XIII turu çərçivəsində “Qəbələ” “Kəpəz”in qonağı olub
Böyük hesabla məğlub olan “Kəpəz”in qapıçısı Davud Kərimi oyun haqda fikirlərini bildirib:
-Yeni baş məşqçi ilə bağlı fikirlərinizi öyrənmək istərdik:
-Buna sadəcə hörmət edə bilərik, çünki bu bizdən asılı olan birşey deyil. Şahin Diniyev getdi və Yunis Hüseynov gəldi. Biz çox istərdik ki, qalib gələk. Yeni baş məşqçinin ilk oyununda bu cür nəticə istəməzdik.
-Yunis Hüseynov oyundan sonra nə dedi sizə?
-Yunis müəllim dedi ki, bu oyunu unudaq. Qarşıdakı oyunlara baxaq. O bizə söz verdi ki, gələn oyunlarda daha yaxşı nəticələr əldə edib, rəqiblərə “baş ağrısı” olacağıq.
– 2-ci qol və 4-cü qol Davud Kərimovun adına yaraşmayan qol idi. Nə deyə bilərsən bu barədə?
– 2-ci qolda çox kobud səhv buraxdım. Top gələndə rahat idim ki, onsuz da tutacam və çalışdım ki, oyuna tez başlayım. Sadəcə top əlimdən çıxdı və rəqib bu şansı əldən vermədi. Lakin 4-cü qolda isə mənim səhvim olmadı. Mən oyun vaxtı qabaqdaydım və müdafiəçinin belə səhv edəcəyini dşüünmürdüm.
– İlk qollardan sonra komandada ruh düşkünlüyü hiss olunmağa başladı. Bu ruh düşkünlüyü oyundan öncə də var idimi?
-Biz oyuna tam hazır idik. Biz çox məsuliyyətlə hazırlaşmışdıq. Çox istəyirdik ki, qalib gələk. Heç olmasa 1 xal belə olsa baş məşqçiyə hədiyyə edək. Bəlkə də çox istədiyimizdən alınmadı.
-Davud, belə bir tendensiya var ki, yeni örtük, yeni stadiona qədər “Kəpəz” güclü idi. Lakin bundan sonra “Kəpəz” məğlub olmağa başladı. Belə bir nəticəyə gələ bilərik mi, “Kəpəz” normal stadionda oynaya bilmir?
– (gülür) Mən də fikirləşirəm ki, stadionla bağlı ola bilərmi? Ötən mövsüm heç kim bizdən burda xal ala bilmirdi. Sadəcə “Qarabağa” məğlub olmuşduq, amma yenə də ümidimizi itirmirik. Düşünürəm ki, əvvəlki “Kəpəz”i bərpa edəcəyik. 3 oyunçumuzun olmaması da öz təsirini göstərdi.
– 2 baş məşqçi arasında fərq varmı?
– Hər ikisi yaxşı məşqçidi. Lakin Şahin Diniyev müdafiə prinsipli oyun qururdusa, Yunis Hüseynov daha çox hücum meyilli oynamağa üstünlük verir. Biz də ümid edirik ki, Yunis müəllimin bütün taktikalarını oyunda tətbiq edək və qalib olaq.
