Yeni mövsümdə də “Xəzər Lənkəran”ı çalışdırmağa razılıq verən Mustafa Dənizli heyəti gücləndirmək niyyətindi. Cari mövsüm yerli futbolçuların azlığından əziyyət çəkən türk mütəxəssis ilk olaraq bu problemi yoluna qoymaq niyyətindədi.
Korner.az-ın məlumatına görə, Dənizlinin transfer siyahısında Azərbaycanın aparıcı futbolçuları var. Onlardan dördünün kimliyini müəyyənləşdirmək mümkün olub. Hücum xəttini gücləndirmək istəyən türk mütəxəssis “Bakı”dan Rauf Əliyevlə “Simurq”dan gənc Rəşad Eyyubovu hədəfə alıb. Dənizlinin yarımmüdafiə xəttinə “Neftçi”nin kapitanı Rəşad Sadiqovla “Bakı”nın üzvü Əfran İsmayılovun transferini istəyir.
Raufla Əfranın transferinin baş tutması mümkündü. Çünki hər iki futbolçunun “Bakı”nın baş məşqçisi Milinko Pantiçlə münasibətləri yaxşı deyil. Üstəlik klubdakı maliyyə böhranı getdikcə ciddiləşir və bu futbolçuların komandanı tərk etməsi gözlənilir. Düzdü, Əfranın xidmətində Avropa Liqasında çıxış edəcək “Neftçi” və “Qəbələ”də maraqlıdı. Amma “Xəzər Lənkəran” daha sərfəli maliyyə şərtləri ilə Əfranı şirnikləşdirə bilər.
Qeyd edək ki, Rauf Əliyev bu mövsüm Premyer Liqada 26, Əfran İsmayılov 17, Rəşad Eyyubov 29, Rəşad Sadiqov 30 oyun keçirib. İlk iki futbolçu 8 vurub, digər ikisi 3 qol vurub.
