"İlk hissəni qiymətləndirmək olar. İkinci hissədə “Bakı”nın heyətində meydanda gənc futbolçular vardı. Onlara şans verilmişdi. 90 dəqiqəni nəzərə alsaq, meydandakı İspaniya çempionatından tanıdığımız “Atletiko” deyildi. Ancaq ümumilikdə götürdükdə, böyük bir futbol bayramı idi. Bu, Azərbaycan üçün çox yaxşı bir reklamdı. Bütün futbol həvəskarları dünənki oyundan həzz aldılar. Fikrimcə, daha yaxşı futbolu dünən gec saatlarında “Real”la “Borussiya” arasında izlədik. Bu 2 oyun arasında fərq hiss olunurdu".
Korner.az-ın məlumatına görə, bu sözləri Azərbaycan milli komandasının baş məşqçisi Berti Foqts deyib. “Futbol “Bakcell” ilə” layihəsi zamanı brifinq keçirən alman mütəxəssis daha sonra millinin may ayının 29-da Qətər seçməsi ilə yoxlama oyununa da toxunub:
"Dəvət Qətərdən gəlib, bütün xərcləri ödəyirlər. Bizim də millidə bir sıra futbolçular ki, çempionatda daim oyun təcrübələri yoxdur. Vaqif Cavadov, Bədavi Hüseynov, Əfran İsmayılov, Əli Gökdəmir, Rüfət Dadaşovu misal göstərmək olar. Yəni bu baxımdan yoldaşlıq görüşü bizim üçün vacibdir ki, həmin futbolçulara özlərini göstərmək üçün şans verək. İkinci vacib məsələ odur ki, Lüksemburqla oyunda Rauf Əliyevlə Vüqar Nadirov bizə kömək edə bilməyəcəklər. Hər ikisi cəzalıdır. Buna görə oyun başqa futbolçuları sınaqdan keçirmək üçün bir şansdır.