“Bakı” ilə Madridin “Atletiko” klubu arasında əməkdaşlığa dair müqavilə imzalanacaq.
Korner.az-ın məlumatına görə, bu barədə İspaniya klubunun baş meneceri Migel Anhel Gil Marin keçirdiyi mətbuat konfransında məlumat verib.
Qonaq qeyd edib ki, artıq müqavilənin bütün detalları müzakirə edilib və yaxın günlərdə imzalanacaq. Azərbaycanda gördüyü qonaqpərvərlikdən razılığını bildirən Gil Marin, anlaşmanın təməlinin necə qoyulmasından danışıb: “Bu əməkdaşlığımızın təşəbbüskarı Hafiz Məmmədovdu. Monakoda "Çelsi" ilə keçirdiyimiz oyundan sonra qərara gəldik ki, əməkdaşlığa başlayaq. Hafiz Məmmədov klubumuzun təcrübəsini "Bakı"yla bölüşməsini və birgə inkişaf etdirilməsini təklif etdi. Bizim məşqlər çox yüksək səviyyədə keçirilir. Hafiz müəllim də istəyir ki, həmin təcrübədən burada da istifadə olunsun. O, bizi buraya klubun infrastrukturu ilə tanış olmağa dəvət etdi. Buradakı şəraiti, Bakını görəndə müsbət mənada təəccübləndim”.
Əməkdaşlığın konkret sahələri ehtiva etdiyi ilə bağlı suala cavabında Gil Marin qeyd edib ki, əməkdaşlıq müxtəlif sahələrdə olacaq: "İlk növbədə futbol sahəsini inkişaf etdirmək nəzərdə tutulub. Gələn ay “Atletiko”nun 2 məşqçisi buraya öz təcrübəsini bölüşməyə gələcək. Onlar burada həm də 15 yaşadək 4-5 futbolçu seçib akademiyamıza aparacaqlar. Gələcəkdə “Bakı”yla yoldaşlıq görüşü keçirməyimiz də nəzərdə tutulub. Gələn ilin iyunda-iyul aylarında Tailanda və Səudiyyə Ərəbistanda yoldaşlıq oyunları keçirəcəyik. Həmin turne zamanı Azərbaycana da gəlməyə çalışacağıq.Əməkdaşlıq çərçivəsində "Atletiko"nun atributlarının burada, "Bakı"nın atributlarının isə İspaniyada satışının təşkili planlaşdırılır. “Bakı”da Nurlan Novruzovu çox bəyənirəm. Ümid edirəm ki, növbəti il çempion kimi Bakıya gəlib, uğurumuzu burada birgə qeyd edəcəyik”.
Sonda “Bakı”nın vitse-prezidenti Yaşar Seyidov qonağa klubun xatirə hədiyyəsini təqdim edib.
