“Biz oyuna yaxşı başlamışdıq. Amma hesabı açan tərəf “Qarabağ” oldu. Düşünürəm ki, Çumbinyo cərimə zərbəsini əla yerinə yetirdi. Başqa nəsə deyə bilmərəm. İkinci qol zamanı isə yaxın künc dəqiq nişan alındı. Digər qollar da vuruldu və “Qarabağ” qələbə qazandı”.
Bu sözləri oyundan sonra Korner.az-a açıqlamasında “Bakı” klubunun qapıçısı Aqil Məmmədov deyib. “Qarabağ”a qarşı keçirilən səfər oyununda 4 qol buraxan 24 yaşlı qolkiper bildirib ki, bu məğlubiyyətə görə, “Bakı”nı siyahıdan silənlər yanılırlar:
“Bu məğlubiyyət bizim üçün son deyil, ola da bilməz. Bəlkə də, başlanğıcdır. Sadəcə, bu gün təkcə mənim yox, “Bakı”nın da günü deyildi. Qarşıdakı oyunlara çox yaxşı hazırlaşmalıyıq”.
Qeyd edək ki, “Bakı” 3 gün sonra Azərbaycan kuboku çərçivəsində “Rəvan”la münasibətlərini ayırd edəcək.
