Azərbaycanlı futbol hakimlərinin 95 faizinin elementar qaydalardan bixəbər olduğunu biz dəfələrlə yazdıq, onlar öyrənmədilər ki öyrənmədilər. Topaz Premyer Liqasının VII turu çərçivəsində keçirilmiş "Simurq" – "Sumqayıt" matçının 36-cı dəqiqəsində baş hakim Ramil Diniyev meydan sahibi komandanın qapısına penalti təyin edir. Qərarın doğru, yaxud yanlış olması deyil məsələ. Məsələ penaltinin yerinə yetirilməsi şəklidir.
Aşağıdakı fotolara diqqətlə baxın. "Sumqayıt"ın penaltini vuran futbolçusu hələ yerindən tərpənməmiş cərimə meydançasına girmiş futbolçuları sayın. Doğrudur, penaltilərdə "zərbə vurulmadan cərimə meydançasına daxil olmaq olmaz" prinsipinə bizimkilər heç vaxt riayət etməyiblər. Amma bir də topa zərbə anının fotosuna (3-cü foto) baxın. Buna deyirlər ağını çıxartmaq! Cərimə meydançasına girmiş futbolçular artıq Məhəmməd Qurbanovla, az qala, eyni xətdədirlər! Və bir də "futbolun it dəftəri"ndə adı olmayan Taitini Afina-2004 olimpiadasında təmsil etmiş Çarlz Ariiotimanın elə həmin olimpiadanın Serbiya və Çernoqoriya – Tunis oyunundakı qərarına, qətiyyətinə baxın (penalti var, yaxud yoxdur söhbəti eləmədən). Belə nümunələr onlarlardı, bu isə heç kimin tanımadığı Çarlzdı. "Qızıl fit"li hakimi olmayan Taitinin Çarlzı…
