Lüksemburq millisinin futbolçusu Maksim Şano müsahibə verib. Korner.az-ın məlumatına görə, 23 yaşlı sağ cinah müdafiəçisi iyunun 7-də Bakıda millimizlə oyunda debüt etmək şanslarından danışıb.
– Lüksemburq rəhbərliyindən sizinlə kim əlaqə saxladı?
– Mənim ana tərəfdən ulu nənəm və nənəm Eş/Alzetdəndir. Lüksemburq yığmasında oynamaq imkanım yarananda bunu ailəmlə müzakirə etdik. Düzünü desəm, bu məsələdə sənədləşməyə cavabdeh anam idi.
– Qərarınıza milli komandada oynayıb tanınmaq istəyi təsir etdimi?
– Düzünü deyirəm, yox. Bu layihənin gerçəkləşməsi ailəmin təşəbbüsü əsasında olub. Anamın əsl köklərini bu ölkədə tapdım. Əgər mənim yığma komandanın formasını geymək imkanım olsa, bu mənim üçün böyük şərəf olar. Çünki əcdadlarımın yaşadığı ölkəmin şərəfini qorumuş olacam. Qərara futbol baxımından yanaşmamışam. Mən hələ yalnız Lüksemburq vətəndaşlığını qəbul etmişəm.
– Siz nə vaxtsa Lüksemburq yığmasının baş məşqçisi Luk Holtsla görüşmüsüz?
– Bizim telefon danışığımız olub. Məşqçi söhbət zamanı məndə yaxşı təəssürat formalaşdırdı. Özüm komandaya qoşulmaq istəyirəm, ancaq bu heç də məndən asılı deyil.
– Siz Lüksemburq yığmasından hansısa oyunçuları tanıyırsız?
– Bəzilərinin adlarını bilirəm. Bilirəm ki, Qay Blez də mənim kimi Belçika çempionatında – “Virton”da oynayır. Eləcə də “Virton”un sabiq futbolçusu Orelyen Yoaximlə Mario Mutşu da tanıyıram. Mutş əvvəllər yaşadığım Fransada “Mets”in formasını geyib.
– 2014-cü il dünya çempionatının seçmə mərhələsində Lüksemburq yığmasının rəqibləri haqda nə deyə bilərsiz?
– Azərbaycan yığmasının bizim qrupda olduğunu bilirəm. Bu komanda ilə Lüksemburqda qolsuz bərabərlik qeydə alınmışdı. Bundan başqa, qrupda Rusiya və Portuqaliya var. Həmin komandalara qarşı oynamaq çətindir. Ancaq ümid edirəm ki, bu oyunlar mənim yığmadakı gələcəyimə aydınlıq gətirəcək.
– Çıxış etdiyiniz “Beersxot” klubu mövsümü başa vurdu. Siz öz fiziki formanızı necə qoruyub saxlayırsız?
– Mən Fransaya qayıtmışam. Monpelyedə fiziki hazırlıq üzrə məşqçi ilə işləyirəm. Əvvəlcə bu hazırlıq mənə növbəti mövsüm üçün lazım idi. Ancaq Azərbaycan yığması ilə oyuna görə milli komandadan dəvət alsam, gündə 2 dəfə etdiyim məşq mənə daha erkən lazım ola bilər.
