Azərbaycan Gimnastika Federasiyası Beynəlxalq Gimnastika Federasiyası tərəfindən (BGF) 2014-cü ildə fərqlənmiş üzv Federasiyalar arasında 3-cü yerə layiq görülüb.
Korner.az-ın federasiyanın rəsmi saytına istinadən məlumatına görə, bu qərar 2015-ci il fevral ayının sonunda BGF-nın Lozanna (İsveçrə) şəhərində yerləşən Baş ofisində İcraiyyə Komitəsinin növbəti iclasında qəbul edilib.
İllik mükafatlandırma proqramı Federasiyaların beynəlxalq fəaliyyətlərinə (Dünya Kubokunda və ən azı 10 Dünya Kuboku mərhələlərində, BGF-nın Konqresi, BGF-nın Simpoziumu, məşqçilik Akademiyası və s.) və yuxarıda qeyd olunan yarışlara vaxtında qeydiyyatın aparılmasına əsasən fərqlənmiş Federasiyaların mükafatlandırılması üçün təsis olunub. Mükafata layiq görülmüş ölkələr sırasına Belarusiya (1), Bolqarıstan (2), Rusiya (4) və Çin (5) də daxildir. Fərqlənmiş Federasiyalara layiq görülmüş yerlərə əsasən BGF tərəfindən pul mükafatları təqdim olunacaq (1-ci yer – 15.000, 2-ci yer– 12.500, 3 -cü yer – 10.000, 4-cü yer – 7.500 və 5-ci yer – 5.000 İsveçrə frankı).
