“Artıq uzun illərdir əcnəbi baş məşqçini yerlidən üstün tuturuq. Ancaq millimiz elə olduğu kimi yerində sayır. Sadəcə, şəraitin yaxşılaşmasını görürük”
Bu sözləri “Neftçi”nin sabiq baş məşqçisi, hazırda birinci divizionda çıxış edən “Sabah”ın çalışdırıcısı Arif Əsədov deyib.
Prosineçkinin gedişindən sonra milliyə yerli mütəxəssisin gətirilməli olduğunu bildirən yığmamızın sabiq üzvü baş məşqçisi vəzifəsinə öz namizədlərini də açıqlayıb: “Millimiz Prosineçkinin rəhbərliyi altında qrupda 5-ci oldu. Bundan o tərəfə yer yoxdu. Foqts 8 il işlədi, Proseineçki 3 il. Bu, az müddət deyil. Onlara yaradılan şərait bizimkilərə də yaradılsa, heç də pis nəticə göstərməzlər. Bu illər ərzində millimiz qrupda bir pillə də irəliləyə bilmədi.
Bu gün millinin baş məşqçisi vəzifəsinə ən real namizəd Qurban Qurbanovdur. Ancaq onun “Qarabağ”dakı işi də Azərbaycan futbolu üçün önəmlidir. Eyni vaxtda iki yerdə işləsə, təbii ki, çətinliklər yarana bilər. Başqa yerli məşqçiyə də müraciət etmək olar. Məsələn, Şahin Diniyev də bu gün millimizi çalışdıra bilər. Onun kifayət qədər təcrübəsi var”.
A.Əsədov “Qarabağ”ın Çempionlar Liqasındakı son uğurlu çıxışlarına da toxunub: “Çelsi” ilə oyundan sonra belə fikirlər yarandı ki, “Qarabağ”a çətin olacaq, bütün komandalara uduzacaqlar. Amma “Qarabağ” getdikcə Çempionlar Liqası oyunlarına adaptasiya oldu. Artıq komandaya inam gəlib. “Atletiko” ilə son oyun da göstərir ki, Bakıdakı qarşılaşmada alınan xal təsadüfi deyil. Oyun planında da “Qarabağ” zəif deyildi. Mən “Qarabağ”da yeni bir oyun sistemi müşahidə etdim. Bu komandanı çempionatda daima hücum edən görmüşük. Amma artıq “Qarabağ” müdafiədə çox yaxşı çıxış edir. Ən əsası komanda pressinq etməklə rəqibə 90 dəqiqə təzyiq yaradır. “Atletiko” ilə hər iki oyunda azlıqda qalmalarına baxmayaraq, yenə də öz oyun prinsiplərindən çəkinmədilər. Artıq “Qarabağ” həm hücumda, həm də müdafiədə oyunu düzgün qurduğu üçün “Atletiko” kimi komandaya müqavimət göstərə bilir”.
A.Əsədovun fikrincə “Qarabağ”dan qrup 3-cüsü olmağı gözləmək komandanı təzyiq altına sala bilər: “Buna ehtiyac yoxdur. “Qarabağ”ın digər 3 rəqibindən fərqi odur ki, təzyiq altında deyil, rahat oynayır. Ona görə də bu gün hansısa sürprizə imza atırlar. Ancaq hansısa yeri tutmaqdan danışsaq, artıq “Qarabağ”ı təzyiqdə saxlayacağıq. Düşünmürəm ki, ilk ilindəcə “Qarabağ”dan qrupda hansısa yeri gözləmək lazımdır”.
qol.az
