"Bu gün bir neçə insanı ixtisar etməli idim. Bu barədə əmr aldım. Çox baxdım. Necə olacağını bilmədim".
Korner.az-ın məlumatına görə, bu sözləri "Neftçi"nin Müşahidə Şurasının rəhbəri yazıçı Çingiz Abdullayev öz "Facebook" hesabında yazıb.
"Sənə güvənib bir neçə təşkilatda rəhbərlik işini tapşırırlarsa, müstəqil qərarlar verməlisən. Hərdən xoş olmayan qərarlar olur, həm "Neftçi"də, həm Fondda, həm də ittifaqda. İxtisar etməli olduğum adam bir ailə başçısıdı. Onun dörd uşağı var, həyat yoldaşı isə hamilədi. İxtisar olunduğunu öyrəndikdə, ağladı. Bunu yazdığım üçün, ümid edirəm məni bağışlayar. Mən onun əmrini imzalaya bilmədim. Sadəcə bacarmadım", – deyə yazıçı şəxsi hesabında yazıb".
Çingiz Abdullayev qeyd edib ki, bəzi rəhbər şəxslər üçün bu qərarları qəbul etmək elə də çətin deyil. Onlar üçün digər insan həyatının önəmli olmadığını vurğulayıb:
"Görünür, yarıtmaz rəhbərəm. Bizim məmurlar kimi sərt və prinsipial olmaq, insanlara tüpürmək asandı. Onlar üçün 100 min və ya milyon dollar çoxdan pul sayılmır. Onlar insanlara açıq-aşkar laqeydlik göstərirlər.
Əmri imzalamadım. İmzalamayacam da. Başa düşürəm, düzgün davranmıram. Mən öz işçilərini ixtisar edənləri günahkar bilmirəm, onların bəzən başqa çıxış yolu olmur. Lakin mən bunu edə bilmərəm. 4 uşaq atasını qoruya bilmirəmsə, kitablarım kimə lazımdı? Bütün bu nailiyyətlər nəyə lazımdı, insanı başa düşə bilmədikdən sonra".
