Onların tək ümidi kubokdusa, bizim də əsas hədəfimiz finala çıxmaqdı.
“Qarabağ”ın yarımmüdafiəçisi Əfran İsmayılovun Korner.az-a müsahibəsi
-Premyer Liqanın 29-cu turu çərçivəsində “Bakı” ilə oyunda gözlənilməz hesab və nəticə qeydə alındı. Bu oyunla bağlı nə deyərdin?
Gözlənilməz məğlubiyyət oldu. Belə nəticələrdə olur futbolda. Bu oyunu unudub qarşıdakı kubok oyununa köklənməliyik. Biz istəmirdik belə məğlub olaq.
-Bu mövsüm “Bakı” ilə oyunlarda uğurlu nəticələr qazanmışdız. Belə çıxır ki, komanda rahatlaşmışdı…
Deməzdim ki, rahatlıq var idi. Biz bütün oyunlarda qələbə qazanası deyilik ki? Bu futboldu. Biri udar, biri uduzar. İstəyirdik ki, yenə qələbə qazanaq. Lakin bu dəfə alınmadı.
-Mövsümün ən az qol buraxan komandası “Qarabağ” bir oyunda qapısında 4 qol gördü…
Bu məğlubiyyətdə səbəb axtarmaq lazım deyil. Bir oyunda 4 qol vura biliriksə, niyə də 4 qol buraxmayaq? Biz bütün oyunlarda qapımızı toxunulmaz saxlaya bilmərik ki… Burda qınamalı nəsə yoxdu.
-Cavab qarşılaşmasında “Bakı”dan revanş almaq mümkün olacaqmı?
İlk oyunda qələbə qazanmışıq və üstün olan tərəf də bizik. “Bakı”nı öz meydanımızda məğlub etməklə finala vəsiqə qazanmaq istəyirik. Məqsədimiz Azərbaycan kubokunu qazanmaqdı.
– “Bakı” da ümidini kuboka bağlayıb…
Onların tək ümidi kubokdusa, bizim də əsas hədəfimiz finala çıxmaqdı. Öz meydanımızda oynayırıq və üstün tərəf “Qarabağ”dı. Sadəcə son məğlubiyyəti unudub, sakit futbolumuzu oynamalıyıq.
-Millimizin növbəti rəqibi Yaponiya yığması oldu. Milli komandanın futbolçusu kimi sürpriz rəqib haqda fikirlərini öyrənmək istərdim
Heç ağlıma gəlməzdi Yaponiya ilə qarşılaşacağıq. Sürpriz komanda oldu şəxsən mənim üçün. Sadəcə onu deyə bilərəm ki, çempionat mayın 18-i bitir, biz isə 20-si Yaponiyaya yollanırıq. Yenə də, qərar onlarındı. Biz futbolçuyuq, çıxıb futbolumuzu oynayacağıq.
Səxavət QURBANOV
