Bu gün Olimpiya Yığmalarının Təlim-Məşq Mərkəzində Futbol Veteranları İttifaqının (FVİ) Konfransı keçirilib. Korner.az-ın məlumatına görə, qurumun prezidenti Rasim Zeynalov çıxış edərək, ötən dövr ərzində görülən işlər barədə ətraflı məlumat verib. Hesabatı bitirdikdən sonra Zeynalov pedaqoji və elmi fəaliyyəti ilə bağlı vaxtının məhdud olduğunu və buna görə vəzifəsindən istefa vermək istədiyini bildirib. O, bununla bağlı yazılı müraciətini İdarə Heyətinə təqdim edib və istefası qəbul olunub. Çıxış edən futbol veteranları Zeynalova prezident olduğu müddətdə səmərəli fəaliyyətinə görə minnətdarlıq edib, ona gələcək işlərində uğurlar arzulayıblar.
Konfransa sədrlik edən Rüstəm Rəhimov gündəlikdəki digər məsələlər haqda məlumat verib. Qeyd olunub ki, qurumun prezidenti vəzifəsinə Oqtay Abdullayevin namizədliyi irəli sürülüb. Məsələ səsə qoyulub və Abdullayev yekdilliklə prezident seçilib.
Tədbirdə iştirak edən AFFA İcraiyyə Komitəsinin üzvü Kazbek Tuayev, AFFA-nın İnformasiya və İctimaiyyətlə Əlaqələr Departamentinin rəisi Mikayıl Quliyev çıxış edərək, quruma gələcək fəaliyyətində uğurlar arzulayıb, futbol veteranlarının daim AFFA-nın diqqət mərkəzində olduğunu bildiriblər. Konfrans işini başa çatdırdıqdan sonra iştirakçılar xatirə şəkli çəkdiriblər.
