“Bakı” klubu Azərbaycan Premyer Liqasında çıxış edə bilər.
Korner.az-ın məlumatına görə, bu barədə klubun icraçı direktoru Yaşar Seyidov məlumat verib.
Hazırda “Bakı”nın prezidenti Hafiz Məmmədov bununla bağlı görüşdədir:
“Görüşdə komandanın Premyer Liqa, yoxsa I divizionda iştirakı məsələsi həll oluna bilər. Dünən də müəyyən şəxslərlə bu istiqamətdə danışıqlar aparılıb. Peşəkar Futbol Liqasının prezidenti Ramin Musayevlə danışmışıq”.
Jurnalistlərə açıqlamasında “Bakı”nın vitse-prezidenti Yaşar Seyidov bunu da əlavə edib ki, Azərbaycanda bütün klubların futbolçularla 4 müqaviləsi olur
Klub rəsmisi futbolçuların məhz belə müqavilələri əllərində rəhbər tutaraq, FİFA-ya şikayət etdiklərini söyləyib:
“Futbolçularla müqavilə bağlayanda yüksək məbləğə razılaşırlar. Amma onlarla centlmen razılaşma da olur ki, az oynasan, maaşı da az alacaqsan. Lakin maaşın ödənilməsində problem yaranan kimi futbolçular FİFA-ya üz tuturlar ki, pulumuz verilmir. Halbuki onlarla müqavilədə belə hallar əvvəlcədən göstərilməlidir. Yəni, futbolçuya bütün oyunlarda iştirakları qarşılığında 100 faiz, sonradan meydana girəcəklərsə, 70 faiz, daim ehtiyatda qalacaqlarsa, 50 faiz ödənilməlidir”.
Artıq AFFA-da Oyunçuların Statusu və Transferi Komitəsinin fəaliyyətə başladığını deyən Y.Seyidov bundan sonra belə məsələlərdə klubların daha peşəkar davranacaqlarına ümid etdiyini bildirib.
Yaşar Seyidov, həmçinin “Bakı” futbol komandasının sabiq baş məşqçisi Milinko Pantiç yenidən Azərbaycana gələcəyini mətbuatla bölüşüb.
Onun sözlərinə görə, serbiyalı mütəxəssis İspaniyanın “Atletiko” və Fransanın “Lans” klubları arasında əlaqələndirici rolunu oynayacaq. “Bakı” nəzdində yaradılacaq 8 yaşdan yuxarı uşaqlar üçün pullu qruplardan seçiləcək futbolçular “Lans” və ya “Atletiko”ya göndəriləcəklər.
Eyni zamanda bu iki klubun dünya ulduzları Bakıya gələrək, uşaqların məşqlərini izləyəcəklər. (Report)
