“Xəzər Lənkəran” Premyer Liqanın XXVI turunda “Turan”ın qonağı olacaq. Bakıda keçiriləcək qarşılaşma rəqiblər arasında sayca 20-ci – yubiley matç olacaq.
Korner.az-ın məlumatına görə, bunadək komandalar 18 dəfə çempionat, 1 dəfə kubokda qarşılaşıb.
Bu gün oynanılacaq qarşılaşmayadək “ağ-yaşıllar” 13 dəfə rəqibini məğlub edib. Penaltilər seriyasınadək davam edən kubok matçının 120 dəqiqəsinin nəticəsini nəzərə alsaq, 4 matç heç-heçə başa çatıb. “Turan” isə cəmi 2 qələbə qazanıb. Bu matçlarda cənub klubu 35 top vurub və 13-nü buraxıb.
Çempionatdakı 18 matçda isə 13 qələbə qazanan Lənkəran təmsilçisi 3 heç-heçə edib və 2 dəfə uduzub. Bu qarşılaşmalardakı top fərqində “ağ-yaşıllar” böyük üstünlüyə malikdi – 34:12.
19 matçdan 17-də rəqib qapısına yol tapan “Xəzər Lənkəran” cəmi 2 dəfə meydanı qolsuz tərk edib. Sonuncu belə matç 2006-cı ilin sentyabrın 23-də baş tutub. Son 14 görüşdə isə “Turan” qapısını toxunulmaz saxlaya bilməyib.
