Premyer Liqanın IX turunda “Qəbələ”ni qonaq edəcək “Xəzər Lənkəran” tarixində 19-cu dəfə bu rəqiblə qarşılaşacaq.
Korner.az-ın məlumatına görə, komandalar indiyədək 16 çempionat və 2 kubok matçında üz-üzə gəlib.
İndiyəqədərki matçların balansında aşkar üstünlüyə malik “ağ-yaşıllar” 11 dəfə qalib gəlib, 4 dəfə “sülh”lə razılaşıb və cəmi 3 dəfə məğlub olublar. Top fərqində də “Xəzər Lənkəran”ın üstünlüyü aşkar görünür – 30:14.
“Xəzər Lənkəran” tarixi ərzində yalnız 1 dəfə “Qəbələ”nin qapısına yol tapmayıb. Bu da səfərdə gerçəkləşib. Ev oyunlarında isə azarkeşlər ən azı 1 dəfə qol sevinci yaşayıblar.
Lənkəranda baş tutan əvvəlki oyunlara gəlincə, 6 qələbəsi olan “Xəzər Lənkəran” cəmi 3 dəfə qonaqlara xal verib: 2 heç-heçə və 1 məğlubiyyət. Bu matçlarda top fərqi 17:7-di. Bu isə o deməkdi ki, qarşıdakı matçda vurulacaq ilk qol Lənkəranda baş tutacaq 10-cu dueldə qeydə alınan 25-ci top olacaq.
“Xəzər Lənkəran”ın kapitanı Rahid Əmirquliyev “Qəbələ” ilə 18 oyunun 16-da oynamaqla rekordçudu. Radomir Todorov 14, Kamran Ağayev 12 dəfə bu rəqibə qarşı “ağ-yaşıl” formada oynayıb. Ümumilikdə isə 73 futbolçu əvvəlki 18 matçın iştirakçısı olub.
“Xəzər Lənkəran”ın vurduğu 30 qola isə 16 futbolçu imza atıb. Kubok oyununda avtoqol müəllifi kimi tarixə düşən “Qəbələ”li İrakli Vaşakidze istisna olmaqla “Xəzər Lənkəran”ın 15 üzvü rəqib qapısına yol tapıb. Bu mənada rekordçu Zaur Ramazanovdu. O, “Qəbələ”ni 6 qolla məyus edib.
İndi əks düşərgədə olan Rəşad Abdullayev 4 dəfə indiki komandasının qapısına yol tapıb. Rahid Əmirquliyevlə Allan Lalin hərəyə 3, Emeka Opara ilə Emin Quliyev hərəyə 2 dəfə qəbələliləri oyuna mərkəzdən başlamağa məcbur ediblər.
Əvvəlki 18 matçda 25 “Xəzər Lənkəran”lı futbolçu 35 vərəqə ilə cəzalanıb. Bu vərəqələrdən 2-si qırmızı olub. Kostadin Cambazov və Alim Qurbanov “Qəbələ” ilə oyunlarda meydanı erkən tərk edənlərdi. Cambazov ümumilikdə 4, Rahid Əmirquliyevlə Adrian Pit 3 vərəqə alıblar.
“Qəbələ” ilə oyunlarda “Xəzər Lənkəran” 3 qapıçıya güvənib. Kamran Ağayev 12 matçda 7, Dmitri Kramarenko 5 oyunda 5 qol buraxıb. Kamal Bayramov isə meydana çıxdığı yeganə qarşılaşmada 2 dəfə məyus olub.
“Xəzər Lənkəran”ın 6 baş məşqçisi “Qəbələ” ilə duellərin iştirakçısı olub. İndiki baş məşqçi Yunis Hüseynov 3-cü dəfə komandanı “Qəbələ” önünə çıxaracaq. Əvvəlki 2 matçda onun yetirmələri uduzmayaraq 4 xal əldə edib. “Xəzər Lənkəran”ın baş məşqçilərindən Ağasəlim Mircavadov 10 (7 qələbə və 3 heç-heçə), Mirça Rednik 3 (2 qələbə və 1 məğlubiyyət) oyunda “Qəbələ” ilə üz-üzə gəlib. Rasim Kara, İqor Ponomaryoov və Cüneyt Biçər isə bu rəqiblə 1 dəfə üz-üzə gəlib. Onlardan biri – Kara qələbəyə sevinibsə, digərləri məğlubiyyətə üzülüblər.
