“Rəvan” qış fasiləsindən sonra keçirdiyi hər iki oyunda qalib gəlib. İstənilən komandaya baş ağrısı yaratmağa qadirdir. Elə ilk dövrədə baş tutan oyunda da qalib gələ bilməmişdik. Rəqibin cüzi də olsa ilk “altılıq” şansları qalır. Ona görə də var güclərini meydana qoyacaqlar. Bilirik ki, bizi çətin oyun gözləyir. Amma təbii ki, meydana üç xal üçün çıxacağıq”.
Korner.az-ın klubun rəsmi saytına istinadən verdiyi məlumata görə, bu sözləri “Qarabağ”ın hücumçusu Vüqar Nadirov deyib.
Ağdam klubunun futbolçusu daha sonra hədəflərindən də danışıb: “Qışda bir neçə transfer etmişik. Bu istər-istəməz həm komandanı gücləndirib, həm də rəqabəti artırıb. Komandamızın hücumçu probleminin olduğunu düşünmürəm. Hazırda Vaqif ön xəttin sivri ucunda çıxış edir. Cavadov heç də pis təsir bağışlamır. Hələ Subaşiç də var. Ümumiyyətlə, kim oynayırsa oynasın, bizim üçün fərq yoxdur. Hamı çıxıb komandaya fayda verməyə çalışır. Bəli, komandada oynamaq üçün rəqabət var. Amma bizdəki qardaşlıq rəqabətidir. Meydanda olan da, olmayan da “Qarabağ”a fayda vermək üçün çalışır. Cari mövsüm qarşımıza çempionluq hədəfi qoyulub. Amma bizim hədəfimiz hər matça çempionluq görüşü kimi çıxıb qalib gəlməkdir. "Rəvan"la oyuna da məhz bu istək və arzuyla yanaşırıq".
