“Arsenal” klubunun baş məşqçisi Arsen Vengerin mövsümün sonunda komandadan ayrılacağı iddia olunur.
Korner.az-ın “The Telegraph”a istinadən verdiyi məlumata görə, komandanın uğursuz çıxışlarından sonra rəhbərlik baş məşqçi postuna yeni mütəxəssislər axtarışına başlayıb.
“Arsenal”ın yeni baş məşqçi vəzifəsinə əsas namizədlər sırasında Brendan Rocers və Yurgen Kloppun adları var. Lakin hələlik rəhbərlik mövsümün sonuna qədər gözləməyi planlaşdırır. Belə ki, “topçular” mövsümü titulsuz başa vuracaqları təqdirdə Vengerlə yollar ayrılacaq. Komandanı kimin çalışdıracağına isə yeni mövsümün startına qədər aydınlıq gələcək.
Qeyd edək ki, 1996-cı ildən “Arsenal”ı çalışdıran Venger komandası ilə 3 Premyer Liqa çempionluğu yaşayıb və 4 dəfə İngiltərə kubokuna sahib çıxıb.
