"Azərbaycan yığması doğma meydanda daha inamlı təsir bağışlayır və martın 22-də Lüksemburqla səfər oyunundakı ilə müqayisədə daha yaxşı görünürdü. Komanda ilk hissədə yaxşı oynadı və hətta qol vurmaq üçün bir neçə imkan əldə etdi. İkinci hissədə isə daha ağır oldu".
Korner.az-ın məlumatına görə, bu sözləri "Qəbələ"nin futbolçusu Aleksandr Çertoqanov Ukrayna mətbuatına müsahibəsində deyib.
"Qəbələ"li yarımmüdafiəçi DÇ-2014-ün seçmə mərhələsində Azərbaycan millisinin Portuqaliyaya qarşı keçirdiyi oyuna da toxunub:
"55-ci dəqiqədə Rauf Əliyevin meydandan kənarlaşdırılması mənfi təsir etdi. Mənə elə gəlir ki, matçın baş hakimi Andre Marriner belə sərt addım atmamalı idi.
O, azərbaycanlı futbolçunun qayda pozuntusuna belə birmənalı reaksiya verməyə də bilərdi. Nəticədə 0:2 hesabı ilə uduzduq. Lakin qrup mərhələsinin son matçınadək mübarizə aparacağıq".
Millidə oynamamağımın səbəbi zədədi. 1 aya yaxındı məşq etmirəm. Yalnız indi fərdi hazırlıqlara başlamışam. Çalışıram ki, əvvəlki durumumu tezliklə bərpa edim.
“Qəbələ”də əvvəlki oyunumu göstərəcəm. Ümid edirəm ki, millimizin baş məşqçisi Berti Foqts bundan sonra məni yenə də yığmaya çağıracaq".
