Tovuzda futbol festivalı
06.04.2023 , 13:38
Futbolun İnkişaf Fondu və “Turan Tovuz” Futbol Klubunun təşkilatçılığı, Azərbaycan Respublikasının Minatəmizləmə Agentliyi (ANAMA), BMT-nin Uşaq Fondu (UNİCEF), Beynəlxalq Qırmızı Xaç Komitəsinin Azərbaycan nümayəndəliyi və Avropa İttifaqının humanitar yardımının maliyyə dəstəyi ilə “Mina və Partlamamış Hərbi Sursatların Təhlükəsinə dair Məlumatlandırma Ayı” layihəsi çərçivəsində 4 aprel – Beynəlxalq Mina xəbərdarlığı və Mina Aksiyasına yardım Günü münasibətilə Tovuz şəhər stadionunda kütləvi futbol festivalı keçirilib.
Korner.az xəbər verir ki, festivalda Tovuz Rayon İcra Hakimiyyəti baçısının birinci müavini Rəşad Zeynalov, Futbolun İnkişaf Fondunun icraçı direktoru Tural Piriyev, ANAMA-nın Baş təlimatçısı Fikrət Şahverənov, UNİCEF-in Fövqaladə Hallar üzrə mütəxəssisi Bəxtiyar Səlimov, futbolçular və məktəblilər iştirak ediblər.
Tədbirdə RİH baçısının birinci müavini Rəşad Zeynalov, Tovuz Rayon Gənclər və İdman İdarəsinin rəisi Sahib Ələsgərov, “Turan Tovuz” PFK İB-nin İdarə Heyətinin sədri Rəşid Məhərrəmov, FİF-nin Himayəçilər Şurasının üzvü, futbol veteranı Asim Xudiyev, ANAMA-nın Baş təlimatçısı Fikrət Şahverənov və UNİCEF-in Fövqaladə Hallar üzrə mütəxəssisi Bəxtiyar Səlimov çıxış edərək festivalın sərhəd kəndlərində mina və partlayıcı hərbi sursatların təhlükəsi barədə cəmiyyət arasında məlumatlılığın artırılması məqsədi daşıdığını vurğulayıblar.
Festivalda “Turan Tovuz” klubunun futbolçuları ilə Əlibəyli, Ağdam, Əsrik Cırdaxan, Ağbulaq və Qaralar kəndlərinin məktəbliləri arasında əyləncəli futbol oyunları keçirilib.
Sonda festival iştirakçılarına hədiyyələr təqdim olunub.
