“Tofiq Bəhramov”un kassalarında bu gün vəziyyət necədir? – YERİNDƏ MÜŞAHİDƏ
15.08.2022 , 17:01
“Qarabağ” Çempionlar Liqasının pley-off mərhələsi çərçivəsində Çexiyanın “Viktoriya” klubu ilə evdə keçirəcəyi oyuna azarkeş marağının yüksək olacağı gözlənilən idi. Matça biletlər dünən saat 11-də satışa çıxarılsa da, online satışı təşkil etməli olan iticket.az saytının çökməsi səbəbindən bileti əlbəəl almaq istəyənlərin stadionun kassaları qarşısında izdihamı yaşanmışdı. “Bəs görəsən bu gün kassalar önündə vəziyyət necədir?” deyib yollandıq qeyd olunan ünvana. Və dünənki qələbəlikdən zərrə də olsa, əsər-əlamət yox idi. Kassaların önü, demək olar ki, boş idi, hər kəs rahatlıqla bilet ala bilirdi. Bir sözlə, onlayn bilet satışının bərpası dünənki problemini kökündən həll edib. Bu vəziyyət bileti kassadan almağa gələn, söhbətləşdiyimiz azarkeşlərin də xeyli ürəyincə olub.
Xatırladaq ki, “Qarabağ” – “Viktoriya” oyunu avqustun 17-si Tofiq Bəhramov adına Respublika stadionunda keçiriləcək. Matça saat 20:45-də start veriləcək.
