"Qəbələ"nin baş məşqçisi Yuri Syomin UEFA-nın rəsmi saytına Azərbaycandakı işindən danışıb.
Korner.az-ın məlumatına görə, Syomin Azərbaycanda stadionlara az azarkeşin gəlməsindən şikayətlənib.
Rus çalışdırıcı bildirib ki, klubda yaradılan şəraitdən razıdı: "Ümumi götürsək, şəraitdən razıyam. Ancaq təbii, insan həmişə daha yaxşısını istəyir. Həm öz klubumun, həm də ölkə futbolunun səviyyəsinin artmasını istərdim. Bu istiqamətdə qurmuşuq işimizi. Xüsusilə gənclərin üzərində daha çox işləyirik. Misal üçün, həftədə bir dəfə ehtiyat komandayla yoxlama oyunu keçiririk ki, bu da gənc oyunçuların inkişafına böyük təsir edir. Ancaq azarkeş marağının az olması təəssüf doğurur. Əvvəllər "Neftçi"nin oyunlarına baxmaq üçün stadionda yer tapmaq olmurdu. İndi isə təəssüf ki, belə deyil. Mənə elə gəlir ki, bu da ölkə futbolunun kifayət qədər reklam olunmamasından irəli gəlir".
Syomin komandasının hazırda birinci pillədə olmasının hələ heç nə demək olmadığını da vurğulayıb: "Mövsümün sonuna hələ çox var. Çox şey dəyişə bilər. Öz komandama gəlincə, müdafiə xəttinin daha güclü olması lazımdı. Bir də komandamda stabillik yoxdu".
