“Beşiktaş” klubunun baş məşqçisi Slaven Biliç Çempionlar Liqasının pley-off mərhələsinin cavab oyunu çərçivəsində qarşılaşacaqları “Arsenal”la oyun haqda fikirlərini yerli mətbuatla bölüşüb.
Korner.az-ın məlumatına görə, xorvatiyalı mütəxəssis “Arsenal”ın bu görüşün favoriti olduğunu xüsusi qeyd edib:
“Çox önəmli oyuna çıxacağıq. Möhtəşəm stadionda dünyanın ən böyük klublarından birinə qarşı mübarizə aparacağıq. İlk oyunda qeydə alınan 0:0 hesabından sonra matçın əhəmiyyəti daha da artdı. İstanbuldakı oyunda “Arsenal”la bacara biləcəyimizi nümayiş etdirdik. Təbii ki, favorit “Arsenal”dır, ancaq biz də özümüzə güvənirik. Yaxşı komandamız var. “Arsenal”ı keçə biləcəyimizə inanırıq”.
Qeyd edək ki, “Arsenal” – “Beşiktaş” oyunu bu axşam, Bakı vaxtı ilə saat 23:45-də başlayacaq.