Şahmatçılar Vüqar Həşimovun məzarını ziyarət etdi
07.12.2023 , 14:53
“Vüqar Həşimov Memorial-2023” superturnirinin iştirakçıları II Fəxri xiyabanda görkəmli şahmatçı Vüqar Həşimovun məzarını ziyarət ediblər.
Korner.az xəbər verir ki, ziyarətdə Azərbaycan Şahmat Federasiyasının prezidenti, Beynəlxalq Şahmat Federasiyasının vitse-prezidenti Mahir Məmmədov, yarış iştirakçıları, federasiya üzvləri, şahmatçılar və Təşkilat Komitəsinin nümayəndələri iştirak ediblər.
Azərbaycan Şahmat Federasiyasının prezidenti Mahir Məmmədov Vüqar Həşimovun dünya şahmatında qazandığı nailiyyətlərin hər zaman qürurla xatırlandığını bildirib: “Hər bir azərbaycanlı Vüqar Həşimovla fəxr etməlidir. Onun oyunları bu gün gənc şahmatçılar üçün bir dərslikdir. Nə qədər ki, şahmat var, Vüqar da həmişə xatirələrdə qalacaq”.
Azərbaycan millisinin üzvü, Vüqar Həşimovun komanda yoldaşı Şəhriyar Məmmədyarov Vüqar Həşimovun adını yaşadan Şahmat Akademiyasında təhsil alanların gələcəkdə bu turnirin iştirakçısına çevriləcəyini vurğulayıb.
İsrail şahmatçı Boris Gelfand Vüqar Həşimovun dünya şahmatında özünəməxsus yeri olmasıyla yanaşı Azərbaycandan gələn təklifi məmnunluqla qəbul etdiyini deyib.
9-cu dəfə təşkil olunacaq Vüqar Həşimov Memorialı bu dəfə Qəbələdə baş tutacaq. Yarışın açılış mərasimi sabah saat 13-00-da Heydər Əliyev Konqres Mərkəzində olacaq.
