Bu gün Topaz Premyer Liqasının X turu çərçivəsində keçirilən “Rəvan” – “Neftçi” oyunundan sonra qonaq klubun məşqçilər korpusunun və rəhbərlikdə təmsil olunan bir neçə nəfərin istefa verdiyi xəbəri yayılmışdı.
Korner.az-ın “ağ-qaralar”ın saytına istinadən məlumatına görə, klubun prezidenti Sadıq Sadıqov komandanın son vaxtlar uğursuzluq zolağına düşməsi və istefa xəbərinə münasibət bildirib.
Sadıqov bildirib ki, “Neftçi”nin “Rəvan”a məğlubiyyəti ilə barışa bilmir, çünki “Neftçi” “Rəvan” kimi komanda ilə hər oyunuda top buraxmadan qalib gəlməlidir: “Buna görə də məğlubiyyətin səbəbləri mütləq araşdırılmalıdır. Mətbuatda klubun vitse-prezidenti Tahir Süleymanovun, Komandanın idman direktoru Güloğlan Cabbarovun, eləcə də baş məşqçi Böyükağa Hacıyevin istefa verməsi haqda xəbərlər də yer alıb. Qəti şəkildə bildiriəm ki, istefalardan söhbət gedə bilməz. Bakıya qayıtdıqdan sonra məşqçilər korpusundan, həmçinin komandanın rəhbərliyindən hesabat tələb edəcəyəm. Məğlubiyyətin səbəbləri araşdırılacaq və günahkarlar ciddi şəkildə cəzalandırılacaqlar”.
Klub prezidenti qeyd edib ki, futbolumuz tarixində bir ilkə imza ataraq, avrokubokların qrup mərhələsinə vəsiqə qazanmış “Neftçi” həm də bütün Azərbaycanı təmsil edir: “Ölkəmizin Avrokuboklardakı yeganə ümidi olan komandamız Rubinə qarşı ağır oyun keçirmişdi. Kazan səfərindən qaytıdıqdan bir gün sonra növbəti görüşə çıxan futbolçularımızın yorğunluğu öz sözünü deməyə bilməzdi. Üstəlik, 3 gün aralıqlarla çempionatda daha iki ağır qarşılaşma bizi gözləyir. Noyabrın 8-də “Neftçi” Bakıda “Rubin”lə cavab görüşünə çıxacaq. Heyətimiz legioner futbolçularla əsasən gənc olan yerli oyunçulardan qurulub. Matçlar da onu göstərir ki, futbolçularımız bu cür ağır qrafikə tam hazır deyillər. Belə olan halda Azərbaycan adını təmsil edən “Neftçi”yə daxili çempionatda oyunlarının təxirə salınması baxımından müəyyən güzəştlər edilməlidir. Çünki, üç gündən bir keçirilmiş oyunlar komandamızın Avrokubok qarşılaşmalarına mənfi təsir edəcək. Nəzərə alsaq ki, “Rubin” və “Partizan”la doğma azarkeşlər önündə oynayacağıq, az da olsa Avroliqanın qrupunda şanslarımızın mövcüd olduğunu düşünürəm”.
Sonda klub prezidenti kimi “Neftçi”nin şərəfini qoruyan hər bir futbolçuya güvəndiyini vurğulayan Sadıq Sadıqov komandanın “Rəvan”a məğlubiyyətdən dərs çıxarıb, qarşıdakı oyunlarda, xüsusən Avroliqa turnirinin qrup matçlarında Azərbaycan xalqını sevindirəcəyinə əminliyini ifadə edib.
