"Qələbə qazanmaq istəyirdik, amma heç-heçə də pis nəticə deyil. Oyunun gedişində hesabda geri düşmüşdük, amma sonda hesabı bərabərləşdirə bildik. Əvəzetmələr də öz sözünü dedi. Hücumlarımızın kəsəri artdı, bir neçə qol epizodu yaxaladıq. Heyf ki, istifadə edə bilmədik. Hər şey artıq keçmişdə qaldı, biz qarşıdan gələn Portuqaliya ilə oyunu düşünməliyik. Bu oyunda layiqli çıxış edərək yaxşı nəticə qazanmaq istəyirik".
Korner.az-ın məlumatına görə, bu sözləri millimizin futbolçusu Ruslan Abışov deyib. DÇ-2014-ün İsraillə seçmə oyunu (1:1) haqda danışan müdafiəçi buraxılan qolda qapıçı Kamran Ağayevin günahı olub-olmamasına münasibət bildirib:
"Qolu anama həsr edirəm. Düzdür, buraxdığımız qolda Kamranın səhvi oldu, amma Kamran elə vəziyyətdədir ki, biz ona dəstək olmalıyıq. Mən çox istərdim ki, o “Xəzər Lənkəran”a qayıtsın və yenidən birlikdə çıxış edək".
"Xəzər Lənkəran"ında şərəfini qoruyan futbolçu sonda qarşıdakı Portuqaliya ilə oyun haqda da fikirlərini bildirib:
"Biz Portuqaliyadan qorxmuruq. Heyətində bu qədər ulduzu olan bir komadaya qarşı oynamaq hər bir futbolçunun arzusudu".