“Azərbaycan çempionuna qarşı oynayacağıq. Rəqibimizin bir neçə oyununun diskinə baxmışıq. Texnikalı oyuna üstünlük verirlər. Heyətində səviyyəli futbolçular var. “Qarabağ” bir neçə gün əvvəl yoxlama matçında qarşılaşdığımız “Mordiviya”ya bənzətmək olar. Bu komandaların oyun stilində oxşarlıq var”.
Korner.az-ın məlumatına görə, bu sözləri “Rudar”ın qapıçısı Miloş Radanoviç Çempionlar Liqasının II təsnifat mərhələsinin ilk oyunu çərçivəsində “Qarabağ”la keçiriləcək qarşılaşmadan öncə deyib.
Monteneqro klubunun təcrübəli qapıçısı mərhələ adlamaq şanslarını da dəyərləndirib: “Biz ilk oyundan sərfəli nəticə ilə dönmək istəyirik. Düşünürəm ki, iki oyunun nəticəsində görə növbəti mərhələyə yüksələ bilərik. “Qarabağ” səddini keçə bilərik”.
