2008-ci il iyun ayının 13-də təsis olunmuş Peşəkar Futbol Liqasının yeni prezidentinin seçkisi yubadılır. Qanunvericiliyə əsasən, bu quruma prezident 4 il müddətinə seçilir. Yəni Ramin Musayevin PFL-ə prezidentlik müddəti 15 gündür bitib. Ancaq bu posta nəinki yeni seçki keçirilməyib, heç seçki kampaniyasına da start verilməyib, namizədlər müəyyənləşməyib. Təəssüf ki, qurumun nizamnaməsini (yaxud əsasnaməsini) əldə edə bilmədiyimizdən, seçkilərlə bağlı prosedur qaydalarını tam olaraq diqqətinizə çatdıra bilmirik (əslində, qurumun nizamnaməsinin, yaxud əsasnaməsinin ictimaiyyətdən gizli saxlanılması da bir qəbahətdi).
Onu da qeyd edək ki, hələ aprel ayında Ramin Musayev mətbuata açıqlamasında seçkilərin iyun ayında keçiriləcəyini söyləmişdi. Nəticə ortadadı: bu gün iyun ayının sonuncu rəsmi iş günüdü və ortada nə seçki var, nə də namizəd(lər). Əvəzində, 15 gündü “srok”u keçmiş PFL prezidenti var…
