"Xəzər Lənkəran"ın kapitanı Rahid Əmirquliyevin Korner.az saytına verdiyi müsahibə.
– Premyer Liqada cari mövsüm yekunlaşdı. İlk "altılıq"dan kənar qalsaz da, kubokun finalına vəsiqə qazana bildiniz. Ümumilikdə mövsümü necə dəyərləndirirsən?
Bu övsüm bizim üçün çox pis alındı. İlk "altılıq"dan kənar qaldıq. Çempionluğa oynayan komandanın ilk "altılığ"a düşə bilməməsi faciə idi sadəcə. Komanda ilk "altılıq"dan kənar qaldıqdan sonra bütün diqqətini kuboka yönəltdi və şükür ki, finala kimi gəlib çıxdıq. Qalır kuboku qazanıb, Lənkərana gətirmək.
– Mövsümün son ev oyununda "Rəvan"a məğlub oldunuz. "Rəvan"a yenilginin səbəbləri kimi nəyi göstərərsən?
Son ev oyunumuzda qələbə qazanmaq istəyirdik. Biz "Rəvan"dan daha yaxşı oynadıq. Sadəcə qol imkanlarından yararlana bilmədik. Rəqib biz tərəf cəmi iki dəfə gəldi və iki qol vurdu.
– Deyirsən ki, hücum edən tərəf siz, qalib gələn isə "Rəvan" oldu. O zaman məğlubiyyətin başlıca səbəbi nədi? Hücumdakı dişsizlik, yoxsa müdafiəçilərin zəif oyunu…?
Futbol belə bir oyundu. Vurmayana vurarlar. Uduzmuşuqsa hamımızın səhvi var. Tək-tək kimisə günahlandırmaq düzgün olmaz.
– İkinci "altılıq" oyunları sizin üçün əhəmiyyət kəsb etmədiyindən, belə desək burdakı oyunları yola verirdiz.
Onu düz demirsiz. Heç bir oyunu yola verməmişik. Biz profisional futbolçularıq, meydana çıxıb işimizi görürük. Bütün oyunlara 3 xal qazanmaq üçün çıxmışıq. Ola bilə motivasiya bir az başqa cür olsun. Yoxsa, yola vermək, mümkün deyil…
– Yenilgi ilə finala hazırlaşırsız. Bu məğlubiyyətin sizə hər hansı bir psixoloji təsiri ola bilər?
Düşünmürəm bu məğlubiyyət bizə hər hansı təsir etsin. Çünki kubokun final oyununun atmosferi başqadı. Bu cür oyunlarda buraxdığımız səhvlərdən nəticə çıxardıb, kuboka hazırlaşacağıq.
– "Xəzər Lənkəran" stabil oyun nümayiş etdirmir. Lənkəranlı fanatlar sevimli komandalarından nə gözləsin?
Əlimizdən gələni edəcəyik ki, kuboku Lənkərana gətirək. İnanıram ki, sonda belə də olacaq. Onlardan güclü dəstək gözləyirik.
– Mahir Şükürov bildirib ki, "Xəzər Lənkəran" sevinsin ki, bizim hesabımıza Avroliqaya getdi. Qarşı tərəfin rəsmiləri, futboçuları çox iddialı danışırlar. Sənin bunlara münasibətini bilmək istəyərdim.
Mahir Şükürov çox şey deyə bilər. Biz onlara 28 mayda sübut edəcəyik ki, onların yox, öz gücümüzə Avroliqaya düşmüşük. Biz "Neftçi"dən zəif komanda deyilik. Vaxt var idi "Neftçi" bizi 3 il idi uda bimirdi. Qələbəyə onları həsrət qoymuşduq. O illər yadlarından nə tez çıxdı.
– Finalın Bakıda keçirilməsini "Neftçi" üçün üstünlük saymaq olarmı?
İnanmıram ki, fərq olsun. Biz harda oynayanda azarkeşlərimiz həmin stadionu doldururlar. Ona görə fərq etməz. Lənkəran, yoxsa Bakı.
