"Rəvan” futbol klubunun litvalı yarımmüdafiəçisi Mindauqas Kalonas uzun fasilədən sonra dəvət aldığı milli komandada növbəti oyununa çıxıb.
Korner.az-ın məlumatına görə, paytaxt klubunun "10” nömrəsi martın 26-da Albaniyanın paytaxtı Tirana şəhərində yerli yığma komandaya qarşı keçirilən görüşdə meydana çıxıb.
Düzdür, Kalonas Slovakiya ilə Braziliyada keçiriləcək dünya çempionatının seçmə turnir oyunundan fərqli, bu dəfə sonradan meydana çıxıb. O, 64-cü dəqiqədə komanda yoldaşını əvəzləyərək oyuna qoşulub. Litva millisi məhz bu dəyişiklikdən sonra təşəbbüsü ələ ala və hesab arasındakı fərqi azalda bilib. Oyun Albaniya millisinin 4:1 hesablı qələbəsi ilə başa çatıb. Ancaq litvalıların macar çalışdırıcısı Çaba Laslonun bu oyunda müxtəlif səbəblərdən 7 əsas heyət futbolçusunun xidmətindən yararlanmadığını da qeyd etməliyik. Başqa sözlə, litvalılar eksperimentlərə əl ataraq nəticəni yox, gələcək pöerspektivi düşündüklərini göstəriblər.
