“Rəqib güclü idi. Bu cür komandalarla qarşılaşmaq bizim xeyrimizədi”.
Korner.az-ın məlumatına görə, bu sözləri 16 yaşadək futbolçulardan ibarət Azərbaycan yığmasının baş məşqçisi Təbriz Həsənov deyib. Antalyada Belarusun U-17 millisi ilə bu gün keçirilən yoxlama görüşünü dəyərləndirən Həsənov istədikləri oyunu göstərə bilmədiklərini etiraf edib:
“Oyunlarda çatışmayan cəhətlərimizi görmək mümkün olur. Bundan əlavə, futbolçuların fərdi bacarıqlarını da görürük. Rəqib komanda bizdən bir yaş yuxarı futbolçulardan ibarət idi. Buna baxmayaraq, oyunçularımız əllərindən gələni etdilər, sona qədər mübarizə apardılar. İstəyimiz cinahlardan hücumlar qurmaq idi, lakin rəqib cinahları bağlayaraq, buna imkan vermədi. Meydançanın vəziyyəti pis olduğundan, mərkəzdən də hücum qurmaqda çətinlik çəkdik. Bu oyunu təhlil edib, futbolçulara lazımi tapşırıqları verəcəyik”.
Qeyd edək ki, U-16 millimiz Belarusun U-17 yığmasına 1:2 hesabı ilə məğlub olub. Komandamız Antalyadakı ilk oyununda isə İsveçrənin “Benfika” klubunun U-17-sinə 9:0 hesabı ilə qalib gəlmişdi.
