“Qarabağ”ın vəkili Qurur Qayə Günal UEFA-nın “İnter”lə oyunla bağlı qərarına münasibət bildirib.
Korner.az-ın məlumatına görə, hüquq müdafiəçisi özünün feysbuk səhifəsində UEFA İntizam Komitəsinin əsassız olduğunu bildirib.
“Dostlar, əlimizə keçən qərar əsassızdır. Heç bir səbəb göstərmədən etirazımızı rədd etdiklərini bildirdilər. Sabah (bu gün-red.) yazılı əsaslandırma tələb edəcəyik. Yazılı əsaslandırmanı əldə etdikdən sonra isə apelyasiya şikayəti verəcəyik. Qərarı mən vermədiyimə görə nəticəyə də söz verə bilmərəm. Nəyə əsaslandıqlarını mən də bilmirəm. Amma sizə sonuna qədər mücadilə edəcəyimə söz vermişdim. Buna görə də mənim üçün problem deyil. Bəziləri ümidini itirmiş ola bilər. Amma mən geri çəkilmirəm və bir daha əmin olun ki, sonadək bu işi aparacağam”, – deyə Qurur xanım qeyd edib.
Xatırladaq ki, UEFA İntizam Komitəsi “Qarabağ”ın oyunun hakimlər briqadasının yanlış idarəçiliyi səbəbi ilə “İnter”lə matçın yenidən keçirilməsi şikayətini rədd edib.
